 Dende a súa creación, a Asociación Síndrome de Down Lugo traballa para que as persoas con síndrome de Down da nosa provincia poidan acadar unha situación de normalización na sociedade, como membros activos e de pleno dereito da mesma. Dende esta perspectiva, e tendo en conta que a educación é clave para o desenvolvemento da persoa, un dos nosos obxectivos é establecer unha colaboración fructífera cos centros educativos. Dentro diste obxectivo, vimos organizando dende hai varios anos unhas xornadas, centradas básicamente no tema da educación, dirixidas tanto ó profesorado como a outros profesionais que traballan en campos relacionados, nas que se abordan diferentes aspectos en relación coa educación das persoas con síndrome de Down. Tendo en conta as suxestións feitas polo profesorado asistente ás Xornadas anteriores para mellorala utilidade e a funcionalidade das mesmas, decidimos organizar este ano o I CICLO DE OBRADOIROS: “abrindo camiños”, que se desenvolverán, cada un deles durante un día, ó longo do curso 2002/03. En cada obradoiro abordarase en profundidade, e coa participación activa dos asistentes, un tema relacionado coa educación das persoas con síndrome de Down ó longo da súa vida; os temas seleccionáronse en función do interese amosado polo profesorado dos centros da nosa provincia e polos asistentes ás xornadas anteriores a través das enquisas de valoración. Con este ciclo de obradoiros pretendemos proporcionarlle ós profesionais que traballan con persoas con síndrome de Down (e tamén con outras discapacidades) estratexias axeitadas e ferramentas de traballo que lles sexan útiles na tarefa educativa. Cada obradoiro estará coordinado e dirixido por un ou varios profesionais cualificados, especialestas no tema a tratar e con ampla experiencia na educación de persoas con síndrome de Down. A pesar de que a organización diste ciclo de obradoiros supón un gran esforzo para a Asociación, estamos convencidos da utilidade dos mesmos e polo tanto facémolo con ilusión e entusiasmo. Queremos transmitir este entusiasmo a tódolos profesionais que traballan con persoas con síndrome de Down e convidámolos a participar activamente naqueles obradoiros que consideren do seu interese ó mesmo tempo que agradecemos o seu esforzo. Estamos seguros que entre todos podemos conseguir que cada día máis persoas con síndrome de Down poidan acadar unha vida adulta plena e activa.
 |